40+仲出嚟趁?

放Lunch入𨋢,隔離team兩個妹豬正討論放工上邊堂瑜伽,其中一個:「唔鍾意8點嗰堂,個教練成40歲仲出嚟教」!

幸好職場廿年練得皮夠厚,「成40歲仲出嚟」先插唔入我嘅玻璃心!

不想討論世代矛盾/仇老/年輕被看輕等問題,畢竟我解決不來,而我又是被後生一輩認定為老、被老一輩認為後生的中年人,因此只能反省自身。

自細看亦舒:「當我40歲的時候,身體健康,略有積蓄,已婚,丈夫體貼,孩子聽話,有一份真正喜歡的工作,這就是成功」,難為我曾沾沾自喜以為已成功,原來世道已變,妹豬認為40歲仲要做就係失敗!可能妹豬認為年過40仲未能退休嘆茶相夫教子就不是成功例子吧?!但以下例子妹豬又未必識……

其實之前因為菲傭懷孕產後回鄉,自己辭職做了兩年full time mom,enjoy嗎?不賴,畢竟仔女那時讀幼稚園,媽媽當然愈多陪伴愈好!

但當他倆上小學,我就不希望自己每朝打理家頭細務等放學,買條裙買個袋禮貌上都要問一問老公,感覺不妥當,所以選擇重回職場。

40歲,當局覺得你仍年輕可換起跑線,後生卻認為你仍在跑道就係獻世,故此,必須認清自己、了解自己,適當的時候做對家庭最適當的選擇,才是中年媽媽應該做的事,因為世上只有一種成功,就是能按自己喜歡的方式,度過自己的一生,才不要理會無關的人之觀感。

中年考車牌 1招紓緩路試緊張感

年輕時從未想過考車牌,始終香港交通方便,而且自知不會享受駕駛樂趣,亦怕打破「考試從未肥佬過」嘅紀錄⋯⋯但這個不打算學車嘅堅持,終於被女兒動搖咗。
幾年前阿女2、3歲仍每日睇PeppaPig嘅時候,某天她突然問我:「點解MommyPig識揸車你唔識嘅?」


雖則童言無忌,但那刻我確實有些難堪,連豬都不如!?
不過working mom分身乏術,拖得就拖,直至本人40歲生日,覺得係時候突破自己,心血來潮收工就衝咗去駕駛學院報名!
筆試排半年,合格後去上模擬駕駛,居然全班最高分,令我對路試信心大增!
奈何學咗10幾粒鐘後,疫情令路試押後!
其實中期試(即泊車調頭上斜)難度不大,依足SOP一定合格!


但出街路試,太多突發事件,於是考試重開後,又補多10幾粒鐘(好貴!好肉赤!)

考前一日,10月居然掛8號風球!令原本緊張的我,更加慌張,因已預計到考試期間會有特別多貨櫃車!教車師傅猛叫我唔好咁緊張!咁你同叫抑鬱症病人開心啲有乜分別呢?!


結果就如預期,中期試合格、路試因燈位開車太近右邊貨櫃車而被考官踩停!
唯有再畀錢補考!

畀咗$2萬幾蚊,在我42歲生日,終於可以去運輸署領取P牌!究竟我敢唔敢揸車送女返學呢?未知!

但我領悟到一件事!
我唔應該當路試係考試,應該當係見工!
考試驚扣分,令我好慌張!但後來我突然意識到,路試嘅模式係唔怕扣分、唔怕出錯,只要你補救到就可以!
於是我在第二次路試,發揮我這廿年在職埸的演技,踩break大力咗依然鎮定、過線望漏盲區仍然面無懼色,總之當考官係上司,唔好畀佢知我真正實力,咁就pass咗!

斷捨離中的母女對談 早了廿年的婆媳關係

換季斷捨離,同阿女一齊執櫃,「嗱,依幾件滿月呀、一歲呀、有紀念價值嘅,就留低畀你,第時傳畀你個女喇,其他就送畀人/捐咗去喇!」
女兒:「我唔會生BB喎!」
我:「哦!點解呢?」
女兒:「我唔想劏開個肚!留畀阿哥個BB喇!」
我:「咁唔駛喇!你阿嫂都未必鍾意!」
女兒:「咩係阿嫂?」
我:「你阿哥個老婆囉!」
女兒:「乜佢咁黑人憎㗎咩?!」

阿新抱真係慘,咁早就畀個奶奶同姑仔講是非!位都未埋就惹負評!